எந்த நேர்சின - ராகம் ஸுத்3த4 த4ன்யாஸி - Enta Nerchina - Raga Suddha Dhanyasi

பல்லவி
எந்த நேர்சின ¹எந்த ஜூசின
எந்த வாரலைன ²காந்த தா₃ஸுலே

அனுபல்லவி
ஸந்ததம்பு₃ ³ஸ்ரீ காந்த ஸ்வாந்த
ஸித்₃தா₄ந்தமைன மார்க₃ சிந்த லேனி வா(ரெந்த)

சரணம்
பர ஹிம்ஸ பர பா₄மான்ய த₄ன
பர மானவாபவாத₃
பர ஜீவனாது₃லகன்ரு₂தமே
பா₄ஷிஞ்சேரய்ய த்யாக₃ராஜ நுத (எந்த)

---

பொருள் - சுருக்கம்
தியாகராசனால் போற்றப்பெற்றோனே!

எவ்வமயமும், மாமணாளன் உள்ளுறை சித்தாந்தமாகிய நெறியின் எண்ணமற்றவர், எத்தனை கற்றாலும், எத்தனை கண்டாலும், எத்தகையவராயினும் பெண்டிர்க்கடிமைகளே

பிறரைத் துன்புறுத்தல், பிறன் மனை, பிறர் பொருள், பிற மனிதரைப் பழித்தல், பிறரால் பிழைத்தல் ஆகியவற்றிற்கு மெய்யல்லாதவற்றையே பகர்வராயினரய்யா.

---

பதம் பிரித்தல் - பொருள்
பல்லவி
எந்த/ நேர்சின/ எந்த/ ஜூசின/
எத்தனை/ கற்றாலும்/ எத்தனை/ கண்டாலும்/

எந்த வாரலு/-ஐன/ காந்த/ தா₃ஸுலே/
எத்தகையவர்/ ஆயினும்/ பெண்டிர்க்கு/ அடிமைகளே/

---

அனுபல்லவி
ஸந்ததம்பு₃/ ஸ்ரீ/ காந்த/ ஸ்வாந்த/
எவ்வமயமும்/ மா/ மணாளன்/ உள்ளுறை/

ஸித்₃தா₄ந்தமு-ஐன/ மார்க₃/ சிந்த/ லேனி/ வாரு/
சித்தாந்தமாகிய/ நெறியின்/ எண்ணம்/ அற்றவர்/ எத்தனை ...

---

சரணம்
பர/ ஹிம்ஸ/ பர/ பா₄ம/-அன்ய/ த₄ன/
பிறரை/ துன்புறுத்தல்/ பிறன்/ மனை/ பிறர்/ பொருள்/

பர/ மானவ/-அபவாத₃/
பிற/ மனிதரை/ பழித்தல்/

பர/ ஜீவன/-ஆது₃லகு/-அன்ரு₂தமே/
பிறரால்/ பிழைத்தல்/ ஆகியவற்றிற்கு/ மெய்யல்லாதவற்றையே/

பா₄ஷிஞ்சேரு/-அய்ய/ த்யாக₃ராஜ/ நுத/
பகர்வராயினர்/ அய்யா/ தியாகராசனால்/ போற்றப்பெற்றோனே/

---

குறிப்புக்கள் - (Notes)

வேறுபாடுகள் - (Pathanthara)

மேற்கோள்கள்

²காந்த தா₃ஸுலே - மாயையின் வயப்பட்டு, யாவும் கடந்த நாரத முனிவரும், பெண்ணாகி, இல்வாழ்வில் உழன்ற கதை தேவி பாகவதம், 6-வது புத்தகம், 28-வது அத்தியாயத்தில் விவரிக்கப்பட்டுள்ளது. இது குறித்து கபீர் தாஸரின் 'மாயா மஹா டக்னி' எனும் பாடலையும் நோக்கவும்.
Top

விளக்கம்
¹எந்த ஜூசின - இதனை சில் புத்தகங்களில் 'எத்தனை தல யாத்திரைகள் சென்றாலும்' என்று பொருள் கூறப்பட்டுள்ளது

³ஸ்ரீ காந்த ஸ்வாந்த ஸித்₃தா₄ந்த - இறைவனிடம் தன்னை ஒப்படைத்தல். ராமகிருஷ்ண பரமஹம்ஸர் இதனை 'இறைவனுக்கு power of attorney கொடுத்தல்' என்று கூறுவார். இது குறித்து 'நாரத பக்தி சூத்திரம்' 19-ல் கூறப்பட்டது -


“இறைவனிடம் சரண் புகுந்து, அவனிடம் தன்னுடைய பணிகள் யாவற்றினையும் அர்ப்பணித்தலும், அவனை மறக்க நேர்ந்தால் ஏற்படும் மிக்கு மன உளைச்சலும் பக்தியின சின்னங்களாகும் என நாரதன் கருதுகின்றேன்”

மாமணாளன் - அரி

உள்ளுறை - உள்ளியக்கமாக

சித்தாந்தம் - முடிந்தமுடிவு

நெறி - இறைவனை எவ்வமயமும் சாட்சியாகக் கொண்டு பணி இயற்றும் நெறி

பிறரால் பிழைத்தல் - பிறரை அண்டி பிழைத்தல்
Top

---